“БИЗ УЛАРНИНГ ЭМАС, УЛАР БИЗНИНГ ОЛДИМИЗГА КЕЛГАН”
“Hamkorbank” АТБнинг Тошкент филиалига 2021 йилдан мижоз бўлдик. Ҳамкорлигимизга сабаб бўлган воқеани жуда яхши эслайман. Ўша куни клиникамизга филиал бошқарувчи ўринбосари Бахтиёр Аҳмадалиев ва корпоратив хизматлар бўлими бошлиғи Бобоназар Тангриев кириб келди. Ўшанда эътиборимизни тортган асосий жиҳат нима бўлди, биласизми? Шу пайтгача бизга бирон нима керак бўлса, ҳамкорлик қилаётган банкимизнинг қайсидир жиҳати ёқмаса, ўзимиз бошқа банкларга бориб, хизматлари билан танишиб, маъқул томонларини сўраб-суриштирардик. “Hamkorbank”нинг ходимлари эса ўзи келиб, хизматларини таклиф қилар экан. Бу банкнинг фоизлари ҳам жуда маъқул бўлди. Мижозлар билан ишлаш усули мақтовга сазовор.
Биз бирга ишлашга қарор қилдик. Ҳатто бир-иккита масала юзасидан Андижондаги бош офисига таваккал қилиб бордим. Департамент раҳбарлари мени эшитиб, вазиятни ўрганиш учун пойтахтга вакилларини юборди. Шу тариқа банк билан алоқа ўрнатилди: аввал ҳисоб-рақамимизни ўтказдик, кейин кредит олдик.
Фаолиятимиз тиббий хизмат кўрсатишга йўналтирилган. Асосан стационар ва поликлиника шароитида кардиология, эндекринология, лор ва терапия йўналиши бўйича тиббий хизмат кўрсатамиз. Кези келганда “Covid” касаллигини ҳам даволадик. Айни вақтда фаолиятимизни кенгайтириш ҳаракатидамиз. Зарур тиббий ускуналар учун четга буюртма ҳам бериб қўйдик. Мақсад — янги бўлимлар ташкил қилиш орқали сифатли тиббий хизматни таъминлаш ва ривожлантириш.
Омадимиз чопиб, 2018 йилда Учтепа кичик саноат зонасидан тендер орқали жой ютиб олган эдик. Ташландиқ бўлган бу ҳудудда 100 та иш ўрнига эга бўлган ишлаб чиқариш корхонаси барпо қилдик. Корхонада пластмасса идишлар, полиэтилен маҳсулотлари: плёнка ва пакетлар ишлаб чиқариш йўлга қўйилди. Албатта, бундай натижаларнинг ортида тадбиркорларнинг саъй-ҳаракатлари ётибди. Таъсисчиларимиз саховатпеша инсонлар. Фақат пулнинг ортидан қувламайди. Энг аввал қўл остида ишлаётганларга яхши шароит яратиб беришга ҳаракат қилади.
Насиб қилса фаолиятимиз янада кенгайиб, кўплаб юртдошларимиз янги иш ўрнига эга бўлади. “Hamkorbank” билан катта ютуқларга биргаликда эришамиз.
Эльнора ЗАКИРОВА,
Чилонзор туманидаги “NBF MED” МЧЖ раҳбари.
