ЗАМИН СИРЛАРИНИ БИЛАДИГАН ТАДБИРКОР
Бугун бозорларимиздаги тўкин-сочинликни кўриб ҳайратингиз ошади. Фаслнинг фарқи йўқ, мева-чева, сабзавотлар, цитрус мевалари ҳатто полиз экинларини топиш муаммо эмас. Илгари иссиқ кунларга хос бўлган помидор-бодрингдан тортиб кашничу-укроп турли кўкатларгача бор. Деҳқончиликнинг ҳадисини олган миришкорлар иссиқхоналар ташкил қилиб, дастурхон тўкинлигини таъминлашмоқда.
“Hamkorbank” АТБнинг Қўқон универсал банк хизматлари офисининг 15 йиллик ҳамкори тадбиркор Эркинжон Акбаров ҳам “Ҳуқанди латиф олтин ва заргар” масъулияти чекланган жамияти ташкил қилиб, қишлоқ хўжалиги маҳсулотлари етиштиришни йўлга қўйди. Айни кунда улар Қўқон деҳқон бозорига помидор, бодринг, лимон ва қалампир каби 10 га яқин маҳсулот етиштириб халқимизга ризқ улашяпти.
Ҳозирги кунда иссиқхона фаолияти жуда оммалашган ва ривожланиб бораётган фаолият турларидан бири ҳисобланади. Шу билан бир қаторда сердаромад.
Меҳнат инсонни зийнатлайди, дейишганича бор. Бу ибора тадбиркор Эркинжон ҳаётида ўз аксини топган.
Лойиҳа қиймати 7 миллиард сўмни ташкил этган иссиқхонада доимий ва мавсумий иш ўринлари яратилди. Сифат озиқ-овқат маҳсулотлари етиштиришда энг биринчи омилдир. Деҳқонлар бунга қатъий амал қиладилар. “Ҳуқанди латиф олтин ва заргар” МЧЖ 2021 йилнинг илк баҳор кунларидан буён ушбу омил асосида фаолият юритмоқда. Ўша кезларда атиги 2 киши ишларди. Ҳозирда ҳам иссиқхона кенгайди, ҳам қўшимча иш ўринлари яратилди.
Эркинжон Акбаров молиялаштириш асносида Қўқон универсал банк хизматлари офиси билан ҳамкорликни йўлга қўйди. Банкдан олинган кўмак иссиқхона тадбиркорлигини пухта ўзлаштириб, ривожлантирган миришкор учун анча қўл келди, қаддини тиклаб олди. У айни пайтда йилига 400 млн. сўмдан зиёд даромад қилмоқда.
— Банк биринчи навбатда мижозларга намунали хизмат кўрсатиши билан эътиборимизни тортди. Ходимларнинг хушмуомалалиги ва ортиқча оворагарчиликлар йўқлиги боис танладик, -дейди тадбиркор. — Муассаса бошқарувчиси Аброржон Раҳимов қатъий тартибда иш ташкил қилган. Элмурод Қодиров, Дониёр Эҳсонов ва Илҳом Йигиталиев каби ходимлар хизматидан мамнунмиз.
Ерга меҳр берган деҳқон учун она замин ўз хазинасини очиб бериши тайин. Қаҳрамонимиз ана шундай ер тилини, қишлоқ хўжалиги илмини яхши биладиганлардан. Шунинг учун бўлса керак, иссиқхонасини хазинага айлантирган. Бугунги кунда меҳнати ва изланишлари, тиниб-тинчимаслиги ортидан оиласи учун қўшимча даромад олиш баробарида бозорлар арзонлигини таъминлашга муносиб ҳисса қўшмоқда.
Н.ЙЎЛДОШЕВА.
