ИККИТА ХАЛҚАРО СТАНДАРТ ҚЎЛЛАНИШГА ТАЙЁР
Коррупция — тараққиётнинг асосий кушандаси. Бугун коррупцияга қарши курашиш давлат сиёсатининг асосий йўналишларидан бирига айланган. Негаки демократик қадриятлар қарор топиб бораётган бир вақтда давлат хизматчилари томонидан порахўрлик, мансаб мавқеини суиистеъмол қилиш билан боғлиқ жиноятларнинг содир этилиши ҳокимиятнинг обрўсизланишига, давлатнинг сиёсий, иқтисодий, ҳуқуқий тизимига путур етишига сабаб бўлади.
Шу боис бугун жамиятнинг ҳар бир соҳасида коррупцияга нисбатан муросасизлик тамойили шакллантирилмоқда. Жумладан, банк тизимида ҳам.
Чет эл капитали иштирокидаги “Hamkorbank” акциядорлик тижорат банки “Коррупцияга қарши курашиш менежменти тизими” — ISO 37001:2016 ва “Комплаенс бошқариш тизими” — ISО 37301:2021 халқаро стандартлари бўйича мувофиқлик сертификатларини қўлга киритди. Банкда мазкур тизимни жорий этиш бўйича “Nika-Certification” компанияси экспертлари томонидан ўтказилган сертификациялаш аудити муваффақиятли якунланди.
Аудит натижасига кўра, “Hamkorbank” АТБнинг “Коррупцияга қарши курашиш менежмент тизими” ҳамда “Комплаенс бошқариш тизими” халқаро стандарт талабларини қўллашга мувофиқлиги тасдиқланди.
