МЕҲНАТ ҚИЛИШДАН ТОЛМАНГ
Суҳбатдошим “Тех Mirziyo” масъулияти чекланган жамияти раҳбари Одинахон Қаҳҳорова болалик хотиралари, онаси ўгитларини эслаб, ўз фалсафасини яратди.
— Онам маҳалламизнинг қўли гул чевари эди. Баъзи кунлари буюртмалари битмай қолганда тунги соат ўн бир-ўн икки, баъзида тонгга қадар уxламасдан кийим тикарди. Бундай пайтларда қараб туролмасдим, қўлимдан келганча ёрдамлашардим. Ёнида туриб, кўмаклашиб, тикишни ўрганиб кетдим.
Тўғриси, тадбиркорликни бошлашдан олдин роса ўйладик, қаердан маблағ оламиз, қандай бошлаймиз, яxши бўладими-йўқми, деб. Рўзғорга оз бўлсаям фойдамиз тегсин, деган мақсадда шу ишни бошлаган эдик, шукр, кам бўлмадик. Биз — фарзандларини бир умр шу ҳунарлари билан таъминлаган онам сиймоси кўз олдимда гавдаланаверади. Уларнинг топганлари отамнинг топганларига қўшилиб, рўзғоримизнинг бут бўлишига ҳисса қўшгани ҳаётий хулосаларимга айланган. Ҳар доим “Қиз бола ҳунарли бўлиши керак. Тикиш-бичишни билсанг, кам бўлмайсан. Пулинг кўп, рўзғоринг бут бўлади, бировга зориқмайсан” дея такрорлагувчи эди. Ана шу сўзлари онгу шууримга зуҳрланиб, тақдиримда ўз аксини топаётгандай гўё
Дастлаб, бичилган тайёр андозаларни тикиб юрган қиз энди ўзи мустақил замонавий ва турли бичимдаги либосларни тика бошлади. Қизидан мамнун онаси унинг ҳунар ўрганаётганидан, келажакда қийналмаслигидан кўнгли тўқ бўлди.
Тикувчиликнинг ҳадисини олган Одина опа тадбиркорликни яшаш уйида — бундан 15 йил илгари бошлаган. Қўшни уй бекалари билан маҳалланинг каттаю кичигига либослар тикиб, кўнгил олди. Мижозлари кун сайин кўпайди. Эҳтиёж ҳам ортди. Тикиш-бичишни ўрганган аёл чеварликдан даромад манбаи сифатида фойдаланишни ўйлади. 2011 йилда якка тартибдаги тадбиркор сифатида фаолиятини йўлга қўйди. Дастлаб ўз ишларини бозорда сотиб юрди. Либослар тиктиришга талаб ошгандан ошиб боргач, фаолиятни кенгайтириш мақсадида тикувчилик цехи ташкил қилишни ният қилди.
Ҳовлисининг катталиги Одина опа орзуси учун имконият яратди. Уйининг бир томонига икки қаватли ишлаб чиқариш корхонаси учун бино қурди. 100 ўринли “Tex Mirziyo” масъулияти чекланган жамиятига қарашли тикув-трикотаж корхонасини ташкил қилди. Цехни техник жиҳозлаш учун “Hamkorbank” АТБнинг Жалақудуқ универсал банк хизматлари офисига кредит олиш мақсадида борди. Банкнинг Ҳукуматимиз томонидан тадбиркорларни қўллаб-қувватлашга оид барча қарорларни мукаммал бажариши Одина опага ёқиб тушди. У имтиёзли равишда биринчи кредитини олди ва корхона учун хом ашё, техникалар сотиб олди. Ўшанда атиги 6 та тикув машинаси билан иш бошлаганди. Ҳозирда уларнинг сони 60 дан ортди.
Маҳалла ёшларига ҳунар ўргатиш орқали иш билан бандлигини таъминлаяпти. Анъана сифатида авлоддан-авлодга ўтиб келаётган тикувчилик энди набира — Мадинахоннинг ҳам қонига сингди. У тажрибали тикувчи-онаси Одинахон Қаҳҳоровага шогирд тушди. Сўнг ўрганганларини амалиётда мустаҳкамлади.
Чеварликда кўзи пишган Мадинахон 20 дан ортиқ жалақудуқлик хотин-қизга касб сирларини ўргатиб, иш билан таъминлади.
— Бошқа банклардан ҳисоб рақамимизни кўчириш борасида таклифлар олдим. Бироқ, мен буни хоҳламадим. Нега? Сабаби оддий: тадбиркор сифатида фаолиятимни бошлаганимдан буён “Hamkorbank” мижозиман. Ходимлари тартибли, интизомли ва ҳалол. Ишлаш тизими тез, сифатли. Асосийси, хушмуомалали йигитлар. Менга энг маъқули ишимни жуда тез ҳал қилиб беришади. Яқинда корхонани иқтисодий ривожлантириш учун бир миллиард сўм имтиёзли кредит олдим. Тендерда ғолиб чиқиб, Олмота шаҳрига маҳсулот экспорт қилишга эришдик.
Ишчилар учун яратилган шароитлар кўнгилдагидек. 2 маҳал иссиқ овқат, дам олиш хонаси меҳнат унумдорлигини оширишга хизмат қилмоқда.
— Қишлоғимизда менга ўхшаган чеварчиликка қизиққан тенгдошларим жудаям кўп. Ушбу фабрика орзуларимизнинг ушалишига ёрдам берди. Болалар ва катталар кийимларини тайёрлаймиз. Биз тиккан кийимларни юртдошларимизнинг устида кўрганда, касбимга бўлган меҳрим янада ошади, — дейди Сурайё Алматова.
Дарҳақиқат, чевар, пазанда, ишбилармон хотин-қизларимиз кўп. Буни жалақудуқлик опа-сингилларимиз мисолида ҳам кўришимиз мумкин.
Н. Тўрақулова
