“ОМАД ШОУ”ДА КИМЛАР ЮТИШИ МУМКИН?

Суҳбатдошимиз — “Менинг юртим” телеканали орқали эфирга узатилаётган “Омад шоу” телеўйини бошловчиси Ботирхон Имомхўжаев.
— Ботир ака, сиз ушбу лойиҳанинг ташкилотчилариданмисиз ёки бошловчи сифатида таклиф этишганми?
— Омад шоу телеўйинимиз 2019 йил эфир юзини кўрди. Мен ҳам бевосита лойиҳанинг ташкил этилишида иштирок этганман ва бошловчилик вазифасини ўз зиммамга олдим.
— Ўйинни кузатиш давомида шу ҳолатга кўп гувоҳ бўлдим, биринчи имкониятда катта суммадаги пул тушаркан-да, кейинги уринишларда бу сумма камайиб бораркан. Наҳотки, тасодифлар доим ўхшаш бўлаверса.
— Бу фикрингизга қўшилмайман. Ўйинда 40 миллион сўмдан 50 миллион сўмгача пул ютуғлари қўйилган ва барабанни айланишига қараб, уларга эга чиқасиз. Автомобиль ютуғи кўп чиққани учун аксарият иштирокчилар пулни олмайди. Кейинги уринишларда эса бошқа миқдордаги ютуққа тўғри келади.
— Барабанни бошқаси айлантириб, ютуқни бошқаси олиши ғалатироқмасми?
— Бу усул бошидан ўйлаб топил­ган. Чунки иштирокчиларнинг барчаси автомобилни ният қилиб келади. Барабанни ўзи айлантирса, ўзи хоҳлаётган ютуқни мўлжаллайди, бошқа биров эса таваккалига айлантиради.
— Бир ҳафтада телефон рақамларининг ўзига 60 мил­лион сўм пул тушяпти. Иштирокчиларнинг энг камида оладиган ютуқли пули 200 миллион сўмдан ортиб кетмоқда. Яна камида битта машина. Агар умумий қўшиб ҳисобласак, битта ўйинда сарф­ланадиган пуллар миқдори катта рақамларни ташкил қилмоқда. Телелойиҳанинг даромади шу даражада юқорими?
— Лойиҳа учун ишлаб чиқарилаётган маҳсулотларнинг ҳажми катта. Маҳсулотлар майда бўлгани билан сони кўп ва харидоргир. Уларнинг сотувидан тушаётган пуллар эвазига йирик миқдордаги совринлар қўйилмоқда. Ўйинни тўхтатмоқчи ҳам бўлганмиз. Ке­йинчалик одамларда ишонч пайдо бўлиб, маҳсулотлар савдоси юришиб кетди ва ўйинимиз ҳам давом этди. Агар ўйин ишончли бўлмаганида аллақачон ёпилиб кетган бўларди.
— Юртдошларимиз орасида “Омад шоу” “Борига барака”ни синдирди, деган гаплар юрибди. Бевосита шу лойиҳа билан ҳамнафас шахс сифатида бу гапларга қандай муносабат билдирасиз?
— Йўқ, бу нотўғри фикр. “Борига барака” кўрсатувига умуман алоқамиз бўлмаган, рақобат ҳам қилмаганмиз. Иккаласи бутунлай бошқа-бошқа телеўйинлар. “Борига барака”нинг тўхталиши сабабларидан бехабармиз.
— Кўрсатув олдиндан ёзиб олиниб, кейин эфирга узатилади. Жонли эфирда намойиш этилса, қанчалик мақсадга мувофиқ бўларди?
— Жонли эфирда бермаслигимизнинг сабаби телеўйинимизда машина топшириш маросими бор. Бунга бир неча кун вақт кетади. Кўрсатув душанба куни ёзиб олиниб, якшанба куни эфирга узатилади. Унгача машиналар эгаларига етказилиб, ютуқлар миқдори ҳисоблаб чиқилади. Барча ютуқлар миқдори жамланиб, кейинги кўрсатувда эълон қилинади.
— Ютуқлар учун давлат божи тўланар экан, шундайми?
— Албатта. Ўйинда қайси ютуққа эга бўлишингиздан қатъи назар, ҳаммаси учун 12 фоизли даромад солиғи тўланади. Тўловни бир йил давомида бўлиб-бўлиб амалга ошириш мумкин.
— Кўрсатув давомида ҳар хил ёшдаги иштирокчилар билан мулоқот қиласиз? Бунга олдиндан тайёргарлик кўрасизми ёки гап ўша пайтда ўзи-ўзидан келаверадими?
— Съёмка пайтида импорвизация қилишимиз тўғри. Бусиз ўйин қизиқарли чиқмайди. Шоу бошловчилари сўзга бой, гапга чечан бўлиши керак. Аммо, барибир, кўрсатувни суратга олишдан аввал иштирокчилар билан танишиб, озроқ гаплашиб оламан. Уларга мулоқот вақтида ҳаяжонланмай, ўзларини эркин тутиш­лари кераклигини тушунтириб ўтаман.
— Шоудаги бошловчилигингиз учун қанча гонорар оласиз?
— Майлими, шу менинг шахсий сирим бўлиб қолса. Қанча пул олишимни ҳатто турмуш ўртоғимга ҳам айтмаганман.
— Бундан яхшироқ лойиҳага таклиф қилиб қолишса, қабул қиласизми ёки шоу билан шартномани ҳали узоқ давом эттирасизми?
— Йўқ, мен шоу билан танилдим. Халқимиз, мухлислар томоша қиляпти. Ҳомийлар, операторлар, ижодкорлар билан ака-укадек бўлиб кетдик. Ҳар битта вилоятда маҳсулотларни етказиб берувчи воситачилар, диллерларимиз бор. Хуллас, бу лойиҳа ортида катта жамоа меҳнат қилмоқда. Муносабатларимиз аъло даражада. Шундай экан, бошқа кўрсатувга кетишимга ҳеч қандай сабаб йўқ.
— “Фалон йил ёки фалон муддатдан бери ўйнайман, рақамим чиқмаяпти, рақамимга пул ҳам тушмаяпти”, деган юртдошларимиз кўп.
— Ҳа, бу ўйинда иштирок этиш ва соврин ютиб олиш фақат омадга боғлиқ. Чунки, ҳамма жараённи автоматлаштирилган махсус дастур бошқаради. Кимнидир рақамини қўшиб қўйиш менинг ёки бошқанинг қўлида эмас. Бир ҳафтада рандом дастури асосида рақамлар янгиланиб туради ва аввалги ҳафтадаги рақамлар ўйиндан чиқади. Ютишни истаган иштирокчи ҳар ҳафта янги смс жўнатиши керак. Ўзимнинг қариндошларим, ошна-оғайниларим ҳам омади чопмаётгани учун мендан хафа. Кўпчилиги аразлаб гапирмай ҳам қўйди.
Икки йил давомида шуни кузатдимки, омад фақат кўнгли пок, чин дилдан ютаман, деб ният қилиб келган ва ҳақиқатан шу пулга, шу ютуққа эҳтиёжи бор иштирокчиларга кулиб боқяпти. Бу ҳам Аллоҳнинг иродаси. Шундай экан, умид қилишдан тўхтаманг ва ўйинимизда иштирок этинг.

Нигора МИРОЛИМ қизи суҳбатлашди.