«ЯНА ҒОЛИБ БЎЛАМИЗ»
Бухоро филиали ходимлари 6 та номинацияда ғолибликни қўлга киритди. Бундай натижа билан ҳар қанча мақтанса арзийди. “Мижоз жалб қилиш бўйича йилнинг энг яхши ходими” номинацияси совриндори, корпоратив хизматлар бўлими етакчи менежери Азиз Иззатовни мулоқотга тортдик. Қаҳрамонимиз жуда камтар ва камгап бўлгани учун фикрларини икки-уч қатор сўз билан ифода қилиб қўя қолди.
— Хоҳлаймизми-йўқми, ҳар қандай натижанинг ортида меҳнат ётади. Жумладан, мен ҳам ишладим, ҳаракат қилдим ва шу ютуққа эришдим. Қанча мижоз жалб қилганимни аниқ айтолмайман, аммо ойига 5-6 та яхши кўрсаткичга эга юридик мижоз келгани аниқ.
Жойларга маркетингга борганимда, биринчи навбатда хушмуомалаликка эътибор қаратаман. Мижоз ҳам биринчи мулоқотдаёқ «ҳа» дейишга шошилмайди. Икки-уч марта бориб, банкимизнинг у учун қулай томонларини тушунтирганимиздан кейин ҳамкорликка рози бўлади. Мен амалга оширган маркетинг натижасида “Gazli quyoshi” МЧЖ, “Oasis Mega Marketing” МЧЖ, “Sanjar Sams Avtotrans” МЧЖ, “Road Star Trans” МЧЖ каби йирик корхоналар мижозимизга айланди.
2011 йилдан буён шу жамоадаман ва унинг ривожига қўлдан келганча ҳисса қўшяпман. Насиб қилса, филиалимиз 2022 йилда ҳам юқори самарадорликка эришади. Ҳозирдан яна ғолиб бўлишни ўз олдимизга мақсад қилиб олдик.
