ЯШИЛ МОЛИЯЛАШТИРИШГА КЎМАК

Қўқон универсал банк хизматлари офисида ишлаётганимга беш йил бўлди. Қўқон аҳолиси ҳамда тадбиркорларига банк хизматларини кўрсатиб келяпман. Бугунги глобал ривожланиш ва иқлим ўзгаришлари шароитида мамлакатимизда экология ва табиатни муҳофаза қилиш, табиий ресурс­лардан оқилона фойдаланиш, яшил майдонларни кўпайтириш, аҳолининг экологик маданиятини юксалтириш давлат сиёсатининг устувор йўналишларидан бирига айланди. Ўтган 2025 йилда шу йўналиш доирасида банкимиз томонидан тадбиркорлик субъектларига яшил молия­лаштириш кредитини ажратиш йўлга қўйилди.

Кўкаламзорлаштиришга ҳисса қўшган, жумладан, суғориш тизимларини ўрнатган, томчилатиш, ёмғирлатиш ва контейнерли (қопли) суғориш тизимини жорий қилган, қувват тежамкорлиги, ускуналар ва технологияларни амалда қўллаган, татбиқ этган тадбиркорларга кредит ажратишда ҳамкорларимиз сони ортди. Айниқса, электромобиллар сотиб олишга бўлган талаб ўсди. Савдо, экологик маҳсулотлар ишлаб чиқарувчи корхоналар билан шартномалар тузилди.
Атроф – муҳитни асраш мақсадида экологияга фойдаси бўлган кредитларни ажратиш хизматини аъло даражада бажаришда, ҳар ойда ўнлаб кредит ажратишни уддасидан чиққаним боис 2025 йил якунида “Йилнинг энг кўп тадбиркорлик субъектларига яшил молиялаштириш кредитини ажратган менежер” номинацияси ғолиби, дея эътироф этилдим.
Юртимизнинг гўзал табиати, мусаффо ҳавоси ҳар қандай кишини ўзига мафтун этади. Айниқса, Қўқонимизнинг бетакрор кўриниши, гўзаллигини асраб-авайлаш, тарихий обидаларини келажак авлодга бус-бутунлигича етказиш ҳар биримизнинг бурчимиз. Банк хизматларини кўрсатишда нафақат шаҳримиз иқтисодий ўсиши, экологик мусаффолигини сақлаш ҳаракатида бўлган тадбиркорларини молиявий қўллаб—қувватлашга ҳисса қўшаётганимиздан хурсандмиз.

Нодиржон РАҲИМОВ,
Қўқон УБХО юридик мижозларга хизмат кўрсатиш бўлими менежери