5 АҚШ ДОЛЛАРИ ЭВАЗИГА АВТОМОБИЛЬ

Кундалик ҳаётимизни автомобилларсиз тасаввур қилиш қийин. Улар нафақат узоғимизни яқин, оғиримизни енгил қилади, балки, фаровонликнинг белгиси сифатида турмуш тарзимизнинг ажралмас қисмига айланмоқда. Кўчани тўлдириб ўтаётган автомобиллар, айниқса, жажжи болажонларда чексиз ҳавас уйғотади. Ҳар бир кичкинтой Миллий армиямиз сафида хизмат қилишни орзу қилгани каби ўз автомобили бўлишини жуда хоҳлайди.
Наманган вилоятининг Чортоқ туманида истиқомат қилувчи Саидолимхўжа Солибоевни ҳам автомобилларга ҳаваси эрта уйғонган. Ҳозирда талаба бўлган йигит ўқишни тамомлагач, ўз меҳнат фаолиятини бошлаб шахсий автомобили учун пул жамғаришни мақсад қилаётган эди. Унинг орзуси узоқ йилларга қолиб кетмади. Атиги 5 АҚШ доллари эвазига “Nexia – 3” автомобилининг соҳибига айланди. Қандай қилиб дейсизми? “Hamkorbank” хизматидан фойдаланган Саидолимхўжа ана шундай бахтга мушарраф бўлди.
Ўтган йилнинг октябрь ойидан ўтказиб келинаётган “Hamkorbank ва Visa биргаликда совғалар улашади” акцияси шартларини бажарган иштирокчи замонавий смартфон ёки супер ютуқ — «Neхia — 3» автомобилини ютиб олиши мумкин. Айтиш жоизки, ютуқли ўйинга старт берилганидан бошлаб, унинг шартлари соддалаштириб борилди. Дастлаб “Hamkorbank”нинг Visa картаси расмийлаштирилиши, 20 АҚШ доллари миқдоридаги харид амалга оширилиши белгиланган бўлса, кейинчалик ушбу маблағ атиги 5 долларга туширилди. Эътиборли жиҳати, банкнинг 30 йиллиги муносабати билан Visa карта бепул тақдим этилиши йўлга қўйилди. Бу иштирокчилар сонининг ортишига сабаб бўлди.
Акциянинг 6-босқич ўйин­лари 10 минг 318 нафар мижоз­нинг карталари ўртасида ўтказилди. Бу аввалги босқичларга қараганда иштирокчилар сони 3 баробарга ортганини кўрсатади. Саидолимхўжа Солибоев ўзининг муваффақиятини шундай таърифлайди:
— Ҳозирги вақтда жуда кўп пул ўтказмалари мавжуд. Лекин уларнинг орасида Visa замонавий, ишончли, қулай ва, энг муҳими, хавфсиз эканлиги билан ажралиб туради. Акам Россия Федерациясида меҳнат қилади. Талаба бўлганлигим боис менинг ва оиламизнинг эҳтиёжи учун ҳар ойда айнан Visa картасига пул ўтказади. Саноқли лаҳзаларда пул келиб тушади. Уни ишлатиш учун банкка боришга ҳожат йўқ. Аввалгидай пластик картадаги пулни нақдлаштириш учун ортиқча вақт сарфламаймиз. “Hamkorbank”нинг Visa картасини расмийлаштиришим мени ажо­йиб акция иштирокчисига айлантирди. Адолатли, ҳалол ўтказилган ўйин натижасига кўра, супер ютуқ ғолибига айландим. Менга “Neхia -3” автомобили насиб этди. Бундан жуда хурсандман. Қувончларим чексиз. Барча ҳамюртларимизга “Hamkor­bank”нинг Visa картасидан фойдаланишни тавсия қиламан. Бу жуда қулай, осон ва хавфсиз.
Қаҳрамонимизнинг отаси Ҳусанхўжа Қамбаров ўз таасс­уротларини қуйида­гича изоҳлади:
— Рости, бошида ишонмадим. Банк ходимларига қайта-қайта қўнғироқ қилдим. Улар машинанинг расмини жўнатдилар. Мана, энди чиройли автомобилнинг эгаси бўлдик. Албатта, хурсандмиз. Автомобиль яхши кунларимизга хизмат қилишини истаймиз. Ўз навбатида бу йил 30 йиллик тўйини нишонлайдиган “Hamkorbank”ка ўзимизнинг чуқур миннатдорчилигимизни изҳор этамиз. Банк ҳамиша ҳозиргидай юксалаверсин!
Акциянинг биринчи супер ютуғи фарғоналик талаба Абдулазиз Муҳаммаджоновга насиб этган эди. Эътироф этиш жоизки, шу кунгача, мазкур акция сабаб 50 нафарга яқин ҳамюртимиз замонавий смартфон соҳибларига айланди.
Наргиза ЭШОНОВА,
“Hamkorbank” АТБ PR-менежери.