“COCA-COLA” ДАСТЛАБ ДОРИ БЎЛГАН

Айни пайтда дунёдаги миллионлаб инсонларнинг севимли ичимлигига айланган “Coca-Cola”нинг яратилиш тарихини бир бор эсга олайлик.

Бу ичимликни 1886 йилда фармацевт Жон Пембертон морфинга қарамликни даволаш воситаси сифатида ихтиро қилади. Ўшанда таркиби сув, шакар, кофеин, кола барглари, кола ёнғоғидан иборат бўлган доривор ичимлик дорихоналарда 5 центдан сотилган. Орадан икки йил ўтиб, Пембертон қашшоқликда оламдан ўтди. Ичимликнинг муаллифлик ҳуқуқини тадбиркор Эйз Кэндлер ихтирочининг бевасидан 2300 долларга сотиб олди. 1892 йилга келиб, у мазкур ичимликни “Coca-Cola” номи билан рўйхатдан ўтказди ва 10 йил орасида 50 нафар ходимга эга “Coca-Cola” компаниясини ташкил қилди.
1905 йилга келиб ичимлик таркибидан кокаин чиқариб юборилди. 1919 йилда компания Эрнест Вудрафф бошчилигидаги инвесторлар гуруҳига 25 миллион долларга сотилди. Компания қайта рўйхатдан ўтди ва оммавий бозорга чиқди. 500 000 дона акциянинг ҳар бири 40 доллардан сотилди.
1943 йилда Европа ва Шимолий Африкада жанг қилган америкалик аскарларнинг маънавиятини юксалтириш ҳамда ушбу ичимликни бутун дунё бўйлаб тарқатиш мақсадида “Coca-Cola” ишлаб чиқарувчи заводлар ташкил қилинди.
1990 йилда ичимлик сотуви 10 миллиард доллардан ошди. 1999 йилда компания ўз маҳсулотларини 157 та давлатда сотиш ҳуқуқини қўлга киритди.
“Coca-Cola” Олимпия ўйинларининг энг биринчи ҳомийларидан ҳисобланади. Бу мақомга у биринчи марта 1928 йилда эга бўлган. 2013 йилга келиб, Coca-Cola 190 дан ортиқ Миллий олимпия қўмиталари билан ҳамкорликни йўлга қўйди.
ОСИЁ тайёрлади.