«HAMKORBANK»ДАН 3 БОР МОЛИЯВИЙ КЎМАК

— 2006 йилда “Orzu teks” масъулияти чекланган жамиятини ташкил қилиб, тадбиркорлик фаолиятимни бошлаганман, — дейди жамият бош директори Шуҳрат Худойберганов.
Шундан буён трикотаж маҳсулотлари ишлаб чиқариш билан шуғулланаман. Юртимиз­да қут- барака бор, хом-ашё заҳираси мавжуд. Ўзимизда етиштирилган пахта толасидан тайёрланган табиий, яъни халқ тили билан айтганда “хб” ки­йим-кечаклар жуда харидоргир. Корхонамизда ана шундай маҳсулотлар ишлаб чиқаришни йўлга қўйганмиз.

Лойиҳа қиймати 80 миллиард сўмни ташкил этган мазкур корхона фаолияти кун сайин ривожланиб бормоқда. Ишлаб чиқариш дастгоҳлари Италия, Хитой ва Туркия давлатларидан келтирил­ган. Йилига 2,5 миллион дона трикотаж кийимлар, ҳар хил турдаги тайёр маҳсулот ва бўялган матолар ички бозордан ташқари Европа ва қўшни республикаларда ҳам харидоргир. Йиллик ишлаб чиқариш ҳажми 7 миллион АҚШ долларни ташкил қилиб, 45 фоизи экспортга йўналтирилади.
— Тадбиркорликни ривожлантиришнинг ўзи бўлмайди, — дейди суҳбатдошимиз. — Иқтисодий камолотга етишиш инсондан катта куч ва ирода талаб этади. Айниқса, шижоат ва таваккалчилик бу борада жуда муҳимлигини тушуниб етдим. Яна фаолиятимизни ривожлантириш учун бизга молиявий кўмак зарурлигини ҳам… “Hamkorbank” АТБнинг Чирчиқ филиалидан 1,5 миллион АҚШ доллари миқдорида кредит олдик. Ана шу маблағ эвазига қаддимизни тикладик, янги иш ўринлари яратдик, анчагина фойда топдик. Ўша кезларда “ана энди қўрқмасак ҳам бўлади. Чунки катта ишчи кучига эга бўлдик”, дея яна 2 бор кредит олдик. Қисқа вақтда кредитларни сўндиришга эришдик.
“Orzu teks”нинг юксалишида банк филиалнинг ҳиссаси катта. Банк мижозга, мижоз эса банкка ишонади. Ана шу ишонч ҳамкорликни мустаҳкамлади.

Йил охирлаб боряпти. Дастлаб 10 нафар ишчи билан иш бошлаган “Orzu teks” МЧЖнинг бугун иқтисодий салоҳияти юксалган. Айни вақтда корхонада 400 дан зиёд чирчиқликлар иш билан банд. Ишлаб чиқариш ҳажми ортяпти. Жамоа ҳозирдан Янги йил режаларини тузиб бўлди. Хусусан, “Hamkorbank” ҳамда давлат фонд жамғармалари томонидан ажратилаётган кредит маблағларидан фойдаланиб, ишлаб чиқариш ҳажмини ошириш, модернизация, маҳсулотлар турини кўпайтириш ва сифатни янада яхшилаш, жаҳон бозорида ўз ўрнини топиш уларнинг бош мақсади.

Нилуфар ЙЎЛДОШЕВА.