ЧОРШАНБА ҚИШЛОҒИДАГИ ҲАМКОР
2020 йилнинг октябрь ойида иш бошлаган Шаҳрисабз филиалининг биринчи мижози “Тадбиркор” хусусий фирмаси бўлди. Мазкур корхона Чоршанба қишлоғида фаолият олиб боради. Тиббий хизматга ихтисослашган бўлиб, 2013 йилда дори-дармонлар савдоси билан иш бошлаган. Бугунга келиб, унга қарашли 2 та дорихона ва 1 та оилавий клиника мавжуд.
Савол туғилади: “Етти йиллик тажрибага эга корхона қандай қилиб ташкил топганига энди бир ой бўлган банк муассасасига мижоз бўлди?” Бунга фирма бош ҳисобчиси Зилола Ғаффорова шундай жавоб берди:
— Аввал Миллий банкнинг туманимиздаги филиали билан ҳамкорлик қилардик. Бу банкдан кредит ололмадик. Ваҳоланки, унинг энг яхши, тартибли, намунали мижозларидан эдик. Муносабатларимизда ҳам, кредит олиш учун топширган ҳужжатларимизда ҳам муаммо бўлмаган. Аммо негадир кредит билан боғлиқ ишимиз битмади. Шундан кейин ҳамкорликни “Hamkorbank” билан давом эттиришга қарор қилдик. Оилавий клиникамиз фаолиятини йўлга қўйиш учун бизга маблағ жуда зарур эди.
Фирма Шаҳрисабз филиалига ҳисоб рақамини олиб ўтиши билан 600 миллион сўмлик кредит шартномасига имзо чекилди. Бу маблағга чет элдан УЗИ, массаж каравоти, гинекологик кушетка, тиббий лабаратория жиҳозлари ва бошқа керакли ускуналар сотиб олинди. Шу тариқа жорий йил бошидан аҳолининг сиҳат-саломатлиги билан шуғулланувчи яна бир тиббий муассаса ишга тушди.
“Hamkorbank” нега кредит беришни пайсалга солмади?
— Балки, янги бўлгани сабабли мижоз йиғиш ёки фаолиятимизни ўрганиб чиқиб, кўзи етгани учундир. Нима бўлганда ҳам вақтимизни олмай ишимизни тезда ҳал этди, — деган фикрни билдирди ҳисобчи. — Мобиль банкка уланганман. Масофадан туриб, амалиётлардан фойдаланаман. Мурожаат қилсам, дарҳол керакли хизматни кўрсатишади. Бу банк ходимларининг одамгарчилигига, мижозга бўлган ҳурмати ва эътиборига қойил қоламан, тўғриси. “Hamkorbank” яхши банк-да. Фақатгина бир илтимосимиз — кредит фоизларини имкон қадар пасайтирилса мижозларга янада қулайлик бўларди.
Ҳа, бундай эътирофларни жуда кўп мижозлардан эшитамиз. Юртдошларимизнинг тадбиркорлик фаолиятини қўллаб-қувватлаётган, уларнинг оёққа туриб олишига кўмаклашаётган, корхона-ташкилотларнинг иқтисодий салоҳиятини ошишига ҳисса қўшаётган молия муассасаларнинг фаолиятига омад ёр бўлсин деймиз.
Нигора МИРОЛИМ қизи.
