ОИЛАДАГИ ОРЗУ УШАЛМОҚДА

Азизбек Имомов изланувчан умидли ёшлардан. 1992 йилда Тошкент вилоятининг Ўрта Чирчиқ туманида дунёга келган. Отаси-Одилхўжа ака деҳқончиликнинг ҳадисини олган. Фарзандларини илмли, етук инсонлар бўлишини хоҳларди. Онаси-Шарофатой уй бекаси бўлсада, фарзанд­ларининг биринчи устози. Ўзбек халқ эртак­ларию ривоятларини кўп билгувчи, муносиб касб танлашларида кўмакчи бўлди.
Ота-она орзу қилганидек, бу оилада шифокору иқтисодчилар вояга етди. Оиланинг кенжаси Азизбек китобни севарди. Умумтаълим мактабида ўқиб юрган кезлариданоқ аниқ фанларни чуқур ўзлаштирди. Эркин мавзуларда ёзиладиган иншоларда, мактаб театрида қўйиладиган саҳна кўринишларида доим иқтисодчи ёки банк ходими образини талқин этарди. Аниқ фанларни мукаммал ўзлаштириш асносида шахматда доим пешқадам бўлди.
У умумтаълим мактабини тамомлагач, Тошкент автомобиль йўллари институтининг маркетинг факультетига ўқишга кириб, энг фаол талабалар сафидан жой олди. Олийгоҳни тугатгач, “Инфинбанк”нинг Сергели филиалида фаолиятини бошлади. 2018 йилда “Hamkorbank”нинг Учтепа филиалига ишга қабул қилинди. Ҳаракатчанлиги, ҳозиржавоблиги, топширилган ҳар бир вазифани ўз вақтида бажариши билан жамоанинг ишончини қозонди.
Азизбек дастлаб ғазна, кейинчалик фронт офисда иш ўрганди. Иқтисодчилик салоҳияти анча етилиб бораётган ёш молиячи зеҳнли бўлганлиги боис қисқа фурсатда фронт офисда транзицион менежер бўлди. Аввалига миллий сўмда, ҳозирда эса волюта амалиётларини ҳам бажариб келмоқда. Жорий йилнинг июнидан 1-тоифали менежер.
Ёш ходимнинг режалари катта. Асосийси, ота-онаси орзу қилганидек инсон бўлиш.

Х. ХАБИБУЛЛАЕВА.