ИЛМ ИЗЛАШДАН ЧАРЧАМАЙМАН

Илк бор “банк” дея аталган даргоҳга кириб келганимдаёқ бу айнан менинг соҳам эканини тушунганман. Шунга ҳам 14 йил бўлибди. Орада менда архитектурага қизиқиш уйғонди, бу йўналишда ҳам таҳсил олдим. Бироқ, зарур пайтда одамлар мушкулини осон қиладиган банк соҳасига бўлган меҳрим барибир устун келди. “Hamkorbank” АТБ Юнусобод филиали очилганига 4 йил бўлган бўлса, илк кунданоқ бу ерда кадрлар билан ишлаб келаман. Аҳил жамоамизнинг шаклланишида ҳиссам борлигидан фахрланаман.
Мустақиллик мен ва мен каби Ўзбекистон ёшлари учун катта имкониятлар берди. Бундан қандай фойдаланиш ўзимизга боғлиқ. “Бешикдан то қабргача илм изла” ақидасига амал қиладиганларданман. Ҳозирда Тошкент молия институтининг бухгалтерия ҳисоби ва аудит йўналишида таҳсил оляпман.
Истиқлол шарофати билан банкимиз равнақ топяпти. Айни дамда ҳисоб илмини ўрганиш асносида ўз устимда ишлаб, юксак орзуларим сари одимлаб боряпман. Ишонаманки, бу йўлда меҳнат қилиб мақсадларимга албатта эришаман. Зеро, инсон кимгадир нафи тегиб яшасагина ҳаётида мазмун бўлади.

Шаҳноза Аҳадова,
Юнусобод филиали кадрлар билан ишлаш менежери.