ИСПАНИЯНИНГ 17 ЁШЛИ «ЮРАГИ»
17 ёшли Ламин Ямал бугун дунёнинг энг машҳур клубларидан бири — “Барселона” ва Испания терма жамоасининг юрагига айланиб улгурди. Мутахассислар бу ўспирин футболчини ўзи етишиб чиққан авлод орасидаги энг умидли ўйинчи сифатида эътироф этмоқда.
Онаси Экваториал Гвинеядан, отаси эса марокашлик бўлган йигитча испанОнаси Экваториал Гвинеядан, отаси эса марокашлик бўлган йигитча испаниядаги аҳолиси 50 минг кишидан камроқ бўлган Эсплугес-де-Лиобрегат деб номланган каталон шаҳарчасида дунёга келган.
Ямал “Барселона” сафидаги илк ўйинини 2023 йилнинг апрелида, 15 ёшу 9 ойлик пайтида ўтказганди. Аслида бу воқеа содир бўлмаслиги мумкин эди. Чунки “Бавария” 2022 йилда келажаги порлоқ ўйинчини ўз сафига қўшиб олиш учун қаттиқ ҳаракат қилганди. Аммо Ямал етти ёшидан буён шуғулланиб келаётган “Барселона”ни тарк этишни истамади.
Каталонияликлар ўтган йили ҳам Ламиндан ажралиб қолишлари мумкин эди — 2023 йил 13 июлда 16 ёшга тўлган Ямал профессионал шартнома тузиш ҳуқуқини қўлга киритди. Агар клуб ўз вақтида келишув амалга оширмаганда, футболчи эркин агентга айланарди. Айни дамда “Барселона” хотиржам, зеро октябрда тузилган шартномага кўра футболчининг товон пули бир миллиард еврони ташкил қилади. Шу пулни тўлабгина жамоалар Ямални “Барселона” розилигисиз қўлга киритишлари мумкин.
Ақл бовар қилмас тасодифни қарангки, 2007 йилнинг декабрида “Барселона” футболчилари “Diario Sport” ва ЮНИСЕФ томонидан ташкил қилинган босма тақвимлар учун хайрия фотосессиясида иштирок этишади ва турли ижтимоий ва этник гуруҳ вакиллари бўлган чақалоқлар билан расмга тушишади. Фотоқаҳрамонлар Каталониянинг қашшоқ ҳудудларидан изланади ва номзод танлаш учун лотерея ўтказилади. Ўшанда Ламиннинг оиласи ғалаба қозонади. Шу тариқа, ҳали бир ёшга тўлмаган гўдак фотосессияларда иштирок этди ва у билан Лионел Месси ҳам суратга тушади. Кейинчалик ўша болакай Ламин Ямал эканлигини эшитиб, кўпчилик ҳайратдан ёқа ушлади.
Болакай “Евро-24”да ёрқин порлади. У ярим финалда Франция даврозасига урган фантастик голи, тўртта голли узатмаси, ақлбовар қилмас ҳаракатлари билан олқишларга кўмилди. Турнирнинг “энг яхши ёш ўйинчиси” дея эътироф этилган Ямалнинг трансфер нархи ҳам 90 миллион евродан 120 миллион еврога кўтарилди. Бу ҳам ўзига хос рекорд. Сабаби футбол тарихида ҳали ҳеч қайси ўйинчи 17 ёшида 100 миллион евродан ошмаган.
Нима бўлганда ҳам ота-онасининг орзуларини рўёбга чиқараётган Ламин 17 ёшида Европа чемпионлигини қўлга киритди. Энди эса уни ёрқин келажак кутиб турибди.
ОСИЁ тайёрлади.
