МОДДИЙ ЁРДАМ ПУЛИ БЕРИЛИШИ КАФОЛАТЛАНГАНМИ?
Сизнинг ҳуқуқингиз
Савол: Қонунчилигимизда бюджет ташкилотида ишловчи ходим меҳнат таътили даврида соғлигини тиклаши учун соғломлаштириш пули-моддий ёрдам ажратилишини сўраб мурожаат қилса, моддий ёрдам берилиши кафолатланганми? Ёки ташкилот раҳбарини моддий ёрдам пулини бермасликка ҳаққи борми?
Ўзбекистон меҳнат қонунчилигида бюджет ташкилотида ишловчи ходимга меҳнат таътилига чиқишда соғлигини тиклаши учун соғломлаштириш пули-моддий ёрдам бериш тўғрисида юридик кафолатланган умумий қоида ёки мажбурий норма йўқ. Ходимнинг меҳнат таътилида моддий ёрдам олиши (масалан, соғлигини тиклаш учун пул ёки бир ойлик иш ҳақига тенг пул) қонун билан кафолатланмаган. Бундай тўловларнинг берилиши ташкилотнинг ички ҳуқуқий ҳужжатлари, жамоа шартномаси ёки меҳнат шартномасида белгиланган бўлиши мумкин.
Меҳнат кодексида ҳам ходимга соғлигини тиклаши учун алоҳида пул бериш мажбурияти белгиланмаган. Агар ташкилотнинг жамоа шартномаси, ички буйруқлар ёки меъёрий ҳужжатларда (яъни жамоа келишуви) бу тўлов назарда тутилган бўлса, унда ходимга шундай моддий ёрдам тўланади. Шу каби ҳолатларда бундай пул ижтимоий ҳимоя мақсадида берилиши мумкин.
Ташкилот раҳбари қонун билан белгиланмаган моддий ёрдамни бермасликка ҳақли (яъни қонундан келиб чиқадиган мажбурияти йўқ). Агар бу тўлов жамоа шартномаси, меҳнат шартномаси ёки ички ҳужжатларда белгиланмаган бўлса, шунчаки ходимнинг аризасига асосланиб бундай пул бериш қонун билан талаб қилинмаган.
Саволга ҳуқуқшунос Азизбек Жалилов жавоб берди.
Олий Мажлис ҳузуридаги Жамоат фондининг грант лойиҳаси асосида
