МАҚСАД МАНЗИЛИМ — БОШ БАНК
2026 йилнинг бошида турибмиз. Ҳаётимизнинг яна бир янги саҳифаси очилди. Бу саҳифанинг илк варақларига ўз орзу-мақсадларимизни катта ҳарфлар билан битишимиз керак. Зеро, психологияда “ёзилган тилаклар ижобат бўлади” деган қарашлар мавжуд.
2023 йилда Тошкент давлат иқтисодиёт университетини тамомлаб, ўзимнинг она юртим — Қорақалпоғистонга қайтдим. Ёшман, шижоатим баланд, юрагимга бир олам орзуларни жойлаганман. Олдимда эса ўз ҳаёт йўлимни белгилаш вазифаси турган эди. Мен “Hamkorbank”ни танладим. Чунки бу банк ўзининг сифатли хизматлари орқали Нукусдаги энг нуфузли муассасалардан бирига айланган. Шу тариқа ўша йили Нукус МБХО жамоаси сафига иш ўрганувчи бўлиб қўшилдим. Орадан бир йил ўтиб, Чакана бизнес бўлимига истеъмол кредити кичик менежери этиб тайинландим. Мана, ўшандан буён оқибатли, меҳридарё жамоам билан биргаман.
2026 йилни “аъло” кайфият билан бошладим. Бунга сабаб 2025 йилдаги натижаларим. Декабрь ойида зиммамдаги кредит ажратиш режасини 190 фоизга бажарганим омадим бўлди. Натижада йилни ёруғ юз билан якунлаб, Янги йилга хурсандчилик билан қадам қўйдим.
Эндиликда янада фаол бўлиш иштиёқидаман. Кўрсаткичларимни ўстиришни мақсад қилдим. Ҳаракат ва меҳнатим орқали кичик менежерликдан менежерликка кўтарилиш ниятим бор. Бош банкка ўтиш бўйича ҳаракатларни ҳам давом эттириб, танловда ўз омадимни синаб кўрмоқчиман. Шу ўринда яна бир режамни айтиб ўтсам. Яқинда қорақалпоқ элининг фахрли инсонларидан бири, ҳукумат арбоби Қаллибек Камаловнинг “Эл хизматида” номли китобини сотиб олдим. Унда муаллифнинг ҳаётий фаолияти ва давлат бошқарувидаги шахсий тажрибалари ёритилган. Ушбу асардан ўзимга керакли нимадир ўрганишни хоҳлайман.
Шахсий ҳаётимдаги режалардан энг муҳими — янги уй сотиб олиш. Янги хонадон оиламга қут-барака, фарзандларимга қувонч олиб келишини истаяпман. Мени қўллаб-қувватловчи, руҳлантирувчи жамоам бор экан, насиб қилса, ушбу йилда кутганимданда ортиқ ютуқларга эришаман, деган умиддаман.
Азийзбек ГЕНЖЕБАЕВ,
Нукус МБХО истеъмол кредити кичик менежери
