“КЕЧА, БУГУН, ЭРТАГА ҲАМ ШУ ЕРДАМАН…”

2000 йилда танишларим “Hamkor­bank”нинг Чиноз филиалида иш борлигини айтиб қолишди. Ҳужжатларимни олиб келдим, мени илиқ кутиб олишди. Бу муносабат менга ёқди ва шу банкда ишлашни хоҳладим. Мана шу воқеага ҳам 21 йил бўлди. Ишни кассирликдан бошлаганман. Ҳозир Бек офис етакчи мутахассисиман.
“Hamkorbank”ка биринчи келганимда ходимлари хушмуомала экан, деган фикр уйғонган ва ҳозир ҳам шу фикримда қоламан.
Мендан “Узоқ йил битта жамоада ишлаб зериккан пайтингиз, бошқа жойга кетиш ниятингиз ҳам бўлганми?” деб сўрадингиз. Тўғрисини айтаман, ҳа бўлган. Ўша пайтда ўзимни ёлғиз қолгандек, ишларим жуда кўпайиб кетгандек ҳис қилганман. Шунда бош банкдан бизга куратор бўлиб келган Бахтиёр ака сабр қилишим кераклиги, бу филиалнинг келажаги порлоқлигини айтиб, тасалли берган. Эртанги кунга умид уйғотган. Унинг маслаҳати ва ўгитларига қулоқ солиб тўғри қилган эканман. Энди жамоамни, ишимни бошқасига алишмайман. Зерикиш ҳам эсдан чиққан, ҳар куни қизиқарли воқеалар бўлади (кулади).
Бу банк менга жуда кўп яхши нарсалар инъом этди. Филиалга ишга келганимда ёш йигит эдим. Ҳозир тўнғич фарзандим 14 ёшда. Оилам тинч, болаларим бекаму кўст улғаймоқда. Албатта, иш орқали топаётган моддий даромадимдан қониқаётганим учун бир жойда қўним билан хотиржам меҳнат қиляпман. Ишингиз бўлса-ю, у ҳаётингизни таъминлай олмаса, режаларни ўзгартиришга мажбур бўласиз.
“Hamkorbank”да ишлаб таниш-билиш, дўст-ошно, ҳурмат-эътибор орттирдим. Бирон корхона-ташкилотга борсам, таниб қолиб, дарров ишимни битириб беришга ҳаракат қилишади. Нимага? Чунки улар ҳам бизнинг филиалимизга келганида иши шунақа тез битган, сарсон бўлмаган.
Банкимизнинг ходимлар салоҳияти, уларнинг ўқиб-ўрганиб, малакасини оширишига бўлган эътиборини жуда маъқуллайман. Ўзим ҳам соҳамизга оид жуда кўп амалиётларни шу ерда ўргандим. Филиалимизнинг бир қанча бўлимларида ишлаб, тажриба орттирдим.
Яхши ишим, интизомим учун ҳануз шу жамоада бўлсам керак. Мен ҳам бу тизимга нимадир бергандирман. Бу балки, мендан иш ўрганиб, билмаганларини билиб, кейин бошқа филиаллар ривожига ҳисса қўшаётган шогирдлар ёки бизнинг хизматимиз, ҳамкорлигимиз туфайли ривожланиб, жамиятда ўз ўрнини топган мижозлардир. Нима бўлганда ҳам “Hamkorbank” — менинг кечаги куним, бугуним, эртам.
Фурқат МУСТАФОЕВ,
Чиноз филиали етакчи менежери.