ЭЪТИБОР УЧУН РАҲМАТ
Бугун ҳеч иккиланмай “Hamkorbank”ни улкан салоҳиятга эга тажриба мактаби деб аташ мумкин. Бу мактабни бунёд этишда иштирок этганлар ҳозирда бобо, буви бўлиб, фарзандлар ардоғида, тинч-хотиржам ҳаёт кечирмоқда. Улар нафақага чиқиб, уйда ўтирган бўлса-да, собиқ жамоаси томонидан бир лаҳза бўлса ҳам унутилгани йўқ. Буни куни кеча ана шундай фахрий ходимлардан 19 нафарини водийдаги сўлим ва хушманзара Аҳмад ал-Фарғоний номидаги дам олиш уйига таклиф этилгани мисолида ҳам кўриш мумкин.
Саёҳат иштирокчилари 60-70 ёшдаги инсонлар, “Hamkorbank” тизимида фаолият юритган, бугун эса кексалик нафақасида. Кўпчилиги ёшига нисбатан анча ёш кўринади. Шу ҳолатнинг ўзи ҳам уларнинг яхши меҳнат муҳитида, мамнунлик билан ишлаганидан дарак беради.
— Ёшим 69 да, — дейди Чинобод филиалининг собиқ ходимаси Лола ая Ваҳобова. — Мен бу банкда 10 йилдан ортиқ фаолият юритдим. Касаллик сабаб 2013 йилда нафақага чиқдим. Шундан буён уйдаман. Нафақага чиққанимга деярли 18 йил бўлса-да, “Hamkorbank” мени унутмади. Байрамларда йўқлаб турибди, мана шу дам олишга ҳам ҳурмат қилиб чақирди. Тўғриси, уйда ўтириб, соғлигим ёмонлашгани, оиламда айрим муаммолар бўлгани учун анча сиқилиб қолгандим. Расул Мухторов қўнғироқ қилганида жуда хурсанд бўлиб кетдим. Бу ерга келиб, кайфиятим анча кўтарилди. Қон босимим ошмасмикин, деб хавотирлангандим. Ҳавоси жуда мусаффо экан, соғлигимдан умуман шикоят бўлмади. Икки кун давомида банкда ўтган кунларимни эсладим. Мана, қолган фахрийлар билан танишдим. Ҳануз йўқлаб, эҳтиром кўрсатиб, шундай жойларга таклиф қилгани учун банк раҳбариятига, шахсан Кенгаш раисига ташаккур айтаман.
Татьяна Никонова Асака филиалида 19 йил ишлаб, 2015 йил нафақага чиқибди. Рус бўлса ҳам ўзбекларга хос чапанилиги бор, шаддод ва ғайратли аёл.
— Филиалга келишим қизиқ бўлган. Ўшанда бошқарувчи 5 та мижоз топиб келсангиз, ишга оламан деганди. Сўзида турди. Фаолиятимни пул муомаласи бўлимида бошладим, кейин назоратчи кассир бўлдим. У пайтларда филиал энди шаклланаётгани учун камчиликлар кўп эди. Йиллар давомида жамоамиз ўсиб, юксалиб борди. Сабр-тоқат ортидан кўп нарсага эришдик. 60 ёшга кирганимда Бош банкдан Манзура Тохтасинова ва Расул Мухторовлар келиб табриклаганида, роса қувониб кетдим. Битта ходимга шунча ҳурмат-эътибор кўрсатадиган бошқа бундай ташкилотни кўрмадим, — деди Асака филиалининг фахрли ходимаси.
«Кексалик — донишмандлик» деб айтганлари рост экан. Англаб етдимки, ҳаёт сабоқ чиқариш учун бериларкан. Ёшликда жуда кўп истакларни, катта-катта орзуларга эришишни хоҳлайсиз. Ёши ўтиб боргани сари орзу-истаклар ўрнини шукроналик, хотиржамлик эгаллар экан.
Дам олиш уйининг сокин оқшомида кўм-кўк арчазорлар чулғаб олган ўриндиқларда хаёл суриб ўтирган отахон, онахонларга қараб шу фикрга келдим. Кайфиятлари анча кўтаринки эканлигидан, шўх мусиқа оҳанглари таралганда, шартта ўрнидан туриб рақсга туша бошлашди. Айниқса, Зафар Қосимов, Раъно Абдураззоқова, Ҳафизахон Тешабоева, Асадулло Мирзаакбаров, Розияхон Тоштемировалар ўйинни роса қотирар экан. Худди ёш болалардек беғубор, яйраб ўйинга тушишларини кўриб, қулфи-дилингиз очилиб кетади.
“Битта телефон қўнғироғининг ўзи қанчалик кайфиятимизни кўтариб юборди. Бизни ўйлаб, дам олишимиз учун жон куйдирган банкимиз раҳбариятига, жамоат ташкилотларига каттадан-катта раҳмат. Бу ерга келаётганимизни эшитиб, фарзандларимиз ҳам хурсанд бўлди. Бизнинг чиройли яшашимиз — уларнинг қувончи”. Отахону онахонлар ўз фикрларини ана шундай ифода этди. Улар дийдор кўришгач, бир-бирларидан қувват олганини, оила ташвишларидан чалғигани, ўтган кунлар соғинчига шундай учрашувлар малҳам бўлишини айтишди. Банкнинг ютуқларини доим кузатиб, эшитиб борар эканлар.
“Шу банкда ишлаб, ёмон бўлмадик, фарзандлар улғайтирдик, тўйлар қилдик. Яхши жойда ишлашнинг ўзи бахт, ундан кейинги даврни ҳурмат-эҳтиромда ўтказиш яна бир бахт!”. Ҳа, бу фахрийларнинг эътирофи. Демак, кексаларга кўп нарса керакмас. Бир оғиз ширин сўз, меҳр-эътиборнинг ўзи мукофот. Буни тушуниб етган Банк раҳбарияти уларга ана шу туйғуни инъом этишга, “Hamkorbank” ривожига меҳнати синган инсонларни муносиб тақдирлашга ҳаракат қилмоқда.
Нигора ТЎХТАМАТОВА.
