БОЛА ҚАЛБИДАГИ БИТИКЛАР

“Hamkorbank”АТБ Чинобод универсал БХО бошқарувчиси Отабек Болтабоев билан суҳбат

— Инсон қаерда туғилса, шу жой унинг учун азиз. Сиз бунга қандай қарайсиз?
— Инсон учун нафақат туғилиб ўсган жойи азиз, балки у ернинг ҳавоси ҳам ёқимли. Андижон ичида бўлсада ишдан қайтишда Балиқчидан чиқиб Улуғнорга кирганимда барча иш юкламалари унутилиб, енгил ҳис пайдо бўлади менда. Гўё атроф гўзаллашгандай, ҳар куни юрган йўлларим бўлсада, қараб тўймайман. Киндик қони тўкилган жой муқаддас, деган туйғу шу бўлса керак.
— Қаерда ва қандай оилада туғилгансиз?
— Улуғнор тумани, Чўлобод маҳалласида ишчи оиласида туғилганман. Отам Умматали ва онам Мавлудахон хўжаликда оддий ишчи бўлганлар. Шунга қарамай дунёқарашлари кенг, фарзанд тарбиясига эътиборли бўлганлик­лари сабаб биз ҳаётда ўз ўрнимизни топишда қийналмадик. Болалигимни, ана шу даврларни жуда соғинаман.
— Оила сиз учун …
— …муқаддас даргоҳ! Жамиятнинг бошланғич бўғини. У қанчалик мустаҳкам ва тинч бўлса, жамият ҳам фаровон бўлади. Беҳаловат оиланинг сабабчиси шу оиланинг бошлиғи.
— Жисмоний меҳ­нат­га ёндашувингиз қандай?
— Ёшликдан меҳнатни ичида ўсганман. Дарс­дан бўш вақтларим ота-онамга ёрдамлашардим. Томорқамиз катта бўлгани сабаб имкон бўлишига жисмоний меҳнат билан шуғулланаман. Бу янгиланишга олиб келиш билан бир қаторда, ақлий меҳнатнинг ҳамоҳанги деб биламан. Тоза ҳаводан тўйиниш имкони ҳам.
— Етакчи учун энг муҳим шарт нима?
— Иш жойи, оила, турли давраларда тартиб-қоидаларга доимо риоя қилиш, адолат­ли бўлиш. Яна эшита олиш, бажариш мумкин бўлган вазифаларнигина қўл остидагиларга тўғри тақсимлаш. Етакчи дегани ўз устида ишламас экан атрофидагилардан олдинда юра олмайди. Бу айниқса, бизни банкда катта аҳамиятга эга.
— Фарзандларингиз келажагини қандай кўрасиз?
— Улар оиламиз кўзгуси. Бола қалби ҳар турдаги ёзувлар ёзиш мумкин бўлган оқ қоғозга ўхшайди. Унга мумкин қадар яхши ёзувлар ёзиш керак. Ижобий ўчмас битиклар уларни комил инсон бўлишга етаклайди. Фарзандларимни одоб­ли, меҳнатсевар, ҳалол ва билимли инсон­лар қилиб тарбиялаш бурчим. Ўйлайманки, мен орзу қилгандек инсонлар бўлиб етишишади.
— Китобга муносабатингиз?
— Инсонда китобга, мутолаага меҳр оиладан бошланади. Ота-онадаги бундай муносабат ўз-ўзидан фарзандларга кўчади. Оила даврасида ўқиган китоб ҳақидаги суҳбатлар ёшларнинг билимларини ошиши ва тафаккурини кенгайишига туртки беради.
Тўғри, мутолаа кўнгил иши, бировни мажбурлаб китобга эгилтириш қийин иш. Бироқ даъват ҳам керак. Мутолаа оламига кириб, ундан бир марта баҳра олган инсон, албатта китоб дунёсига ташрифини канда қилмайди. Оиламизда кичик кутубхона бор. Янги китоблар билан тўлдиришга одатланганман.
— Ёқтирган китобингиз?
— Ўткир Ҳошимов­нинг “Икки эшик ораси” ва Муҳаммад Юсуфнинг барча шеърий китоблари. Муҳаммад Юсуфнинг биринчи шеърий тўплами иқтисод қилинган қоғозлар ҳисобидан чоп этилганлиги айтилади, кейинчалик эса аксинча, нашриётлар учун шоирнинг шеърларини чоп этиш катта ютуққа айланган. Ҳар гал унинг китоб­ларини қўлга олганда, бошқача ҳис қиламан ўзимни. Қайта-қайта варақлайман.
— Бахт нима?
— Туғилиш, ота-онага муносиб фарзанд бўлиш, илм олиш, оила қуриш, жамиятда ўз ўрнини топиш, фарзандли бўлиш ва уларнинг камолини кўриш БАХТ. Аллоҳнинг розилигини олиш. Бу ягона БАХТДИР!
— Ана шундай бахт сизни тарк этмасин. Суҳбат учун раҳмат!

Суҳбатдош Ҳақида: 1980 йилда туғилган, оилада тўнғич фарзанд. Наманган муҳандислик иқтисодиёт институтини тамомлаган. Болаликдан ҳаётдаги шиори-одамларга яхшилик қилиш. Энг катта бойлиги ва ишончли маслаҳатгўйи отаси. Дўстликни қадрлайди, адолатсизликни кечира олмайди.

Н.Эшонова суҳбатлашди.