СУЗИШДАН ИШ ЮРИТУВЧИЛИККАЧА
2014 йилда Ўзбекистон давлат жисмоний тарбия институтини тамомлаганман. Институтда сузиш йўналиши бўйича таҳсил олдим. Агар ўша пайтда кимдир бир кун келиб банк соҳасида ишлашимни айтса, ишонмасдим бунга. Лекин келажагим шу соҳа билан боғлиқ экан. 2023 йилда иккинчи мутахассислик бўйича Тошкент давлат иқтисодиёт университетини тамомлаб, иқтисодчи дипломига эга бўлдим.
2022 йилдан буён Янгийўлда меҳнат фаолиятимни давом эттириб келяпман. Асосан Янгийўл, Нурафшон ва Чиноз УБХО ходимларининг ҳужжатлари билан шуғулланаман. Кадрларнинг келди-кетдисини назорат қиламан. Қачонки ходим ўз иш жойидан қониқмаса, у ердан кетмоқчи бўлади.
Спортга ҳам беэътибор эмасман. 2022-2024 йилларда Марказий банк томонидан Тошкент вилоятида фаолият юритаётган банклар ўртасида ташкил қилинган спорт мусобақаларида Янгийўл УБХО номидан стол тенниси бўйича иштирок этиб, барчасида совринли ўринларни қўлга киритдим. Бу мени руҳлантириб юборди. Ишдан ташқари қўшимча ютуққа эришган ходимнинг касбига бўлган меҳри, иштиёқи икки чандон ошади. Инсонмиз, бир хилликдан зерикамиз ахир.
Стол теннисига қизиқаман. Бунга офисимизда ташкил қилинган теннис бурчаги сабабчи бўлган. Тушликдан сўнг бир оз чигил ёзиш мақсадида шу ўйинни ўйнаб, анча қўлим келиб қолгач, мусобақаларда ҳам қатнашишга қарор қилганман.
Менимча, спорт билан энг кўп шуғулланадиган бизнинг жамоамиз бўлса керак. Тушлик вақтида ўйин билан машғул бўламиз, ҳазил-ҳузул қиламиз. Бу эса жамоадаги аҳиллик ва бирдамликни янада мустаҳкамлайди.
Зуҳра БОБОЖОНОВА,
Тошкент ҳудудий иш юритувчилар гуруҳи етакчи мутахассиси
