ИНСОН ЎЗИНИ ЎЗИ КАШФ ҚИЛАДИ
“Hаmkorbank”АТБ Гулистон минтақавий банк хизматлари офиси чакана бизнес бўлими етакчи менежери Эмине Мансурская билан суҳбатимиз болалик орзулари, касб, дўстлик ҳақида бўлди
.— Балки болалигимда имкониятларимдан фойдалана билмагандирман. Бироқ, беғубор дамларда, ақлим етмаган ҳолда орзулар қилган бўлсам керакки, банк тизимида ўқишни истадим. 2011 йил Тошкент молия институтига ўқишга қабул қилиндим. Орзуларим йўлида илк эшиклар очилди. Дунёқарашингни ўзгартирган он вужудингда ҳам ўзгаришлар юз беради, дейишади. Ўзгаришларга тайёр ҳолда ўз қадриятларимга ҳам бошқача кўз билан қарай бошладим. Бу “Hаmkorbank”да ишламоқчи бўлган ёшлар орасида ўтказилган суҳбатдан ўтганимдан сўнг бошланди.
— Одатда ота-она фарзандини касб сари йўналтиради…
— Менда бошқачароқ. Ота-онам ва яқинларим банк соҳасидан йироқ инсонлар. Юқорида айтганимдек, болалик орзуларим, балки иштиёқим, балки аълочилигим… Ҳа-да ахир банкда ишлаш учун қанча меҳнат қилдим — ўқидим, изландим. Эҳтимол омадим келиб шу жамоага қўшилгандирман. Бугунги кунимдан, шу банкда ишлаётганимдан хурсандман.
— Келинг, ишдан бироз четлашайлик. Ҳеч ўзингиз билан ўзингиз келишолмай қолган вақтлар бўлганми?
— Албатта бўлади. Баъзида ўзим билан ўзим келиша олмайман. Бу менимча кўпчиликда кузатилса керак. Ва доим “Бугунги кунимда кўпроқ иш қилишим мумкин, нега қилмаяпман?” деган саволни бераман. Ўйлаб-ўйлаб дангасаликка йўяман. Салоҳиятим, иқтидорим, кучим орқали камчилигимни йўқотаман. Бу ҳолат негадир яна такрорланаверади. Барибир ақл билан енгаман. Атрофимдаги одамлардан ўрганаман ва ғайрат-шижоатли инсонлардан ибрат олиб яна ишга киришаман. Биламанки, чин юракдан истасам, ҳар қандай ишни уддасидан чиқаман.
— Ноўрин ва бевақт айтилган ҳақиқатнинг кучи қай даражада?
—Инсон эканмизда, жуда кўп неъматларни қадрига етмаймиз. Эришганларим ва бой берганларим орасида яшар эканман, у нарсаларга кўпам эътибор қилмайман. Баъзан нима менинг ўзгаришим, улғайишимга сабаб бўляпти, деб ўйлаб қоламан. Шунда кўпроқ топганларим тарбиялаганини тушуниб етаман. Иккиланиш, афсусланишларга бой берилган вақтимга ачинаман. Имкон борича ҳолатга холисона қараб, ўзимни тинчлантиришга ҳаракат қиламан. Бунга фақат кўнгил кечинмаларию тўғри хулосалар билан барҳам бериш мумкин.
— Дўстлик борасидаги фикрларингиз?
— Инсонлардаги ҳамма яхши фазилатлар қатори дўстликни жамоам аъзоларида кўряпман. Дўст камчиликларингни эслатиб турадиган эмас, сени ўша камчиликларинг билан қабул қиладиган инсондир. Бу борада омадлиман. Ҳамкасбларимнинг ҳаммасини ҳаётимда ўз ўрни бор. Амин бўлганим, инсон муаммога дуч келганда ўзини янгидан кашф қилаверар экан. Умуман олганда ҳар бир инсон ўзини кашф қилади.
Нилуфар ЙЎЛДОШЕВА
суҳбатлашди.
