ПУЛНИ ҚУВГАН ФИРИБГАР АЁЛ
Хушнида Олимова (исм-фамилиялар ўзгартирилган) Бахтиёр Неъматов билан турмуш ўртоғи орқали танишган. Яъни Бахтиёр аёлнинг турмуш ўртоғи Адҳам Олимовнинг синфдоши. Хушнида Хитой давлатидан товар олиб келиб сотар, эри эса машина олди-сотиси билан шуғулланарди. Бизнеслари учун пул зарур бўлиб қолганида Адҳам Бахтиёрдан қарз олиб турарди.
Бахтиёрнинг ҳам ўз бизнеси бор. Хушнида хўжайинига билдирмай, ундан қарз сўрайдиган бўлди. Ишлари юришвермагач, каттароқ пул топиб, бизнесини ривожлантириш кераклиги ҳақида ўйлаб қолди. Ана шундай кунларнинг бирида хаёлига бир режа келди. Бахтиёрни алдаб, пул олса бўлади. Фақат аввал уни берган пулини тезда қайтишига ишонтириш керак. Ана шу мақсадда бобосидан 400 минг АҚШ доллари миқдорида маблағ мерос бўлиб қолгани ва банкда сақланаётгани ҳақида гап тарқатди. Табиийки, хабар Бахтиёрнинг қулоғига ҳам етиб борди. У мерос ҳақидаги эртакка ишонди.
Бу ишонувчанлик жуда қимматга тушди. Аёл икки йилга яқин вақт мобайнида ундан 30 минг АҚШ долларидан ортиқ пулни алдов йўли билан олиб, ишлатиб юборди.
Воқеа қуйидагича кечди. Хушнида Бахтиёрнинг олдига бориб, “Орлондо” русумли автомашинасини давлат мусодара қилиб юбормаслиги учун 3 минг 500 АҚШ доллари керак бўлаётганини айтиб, унга илтижоли боқди. Қарзини банкдаги меросни олиши билан қайтаришга ваъда берди. Хушниданинг катта мерос эгаси эканлиги кўнглини тўқ қилган Бахтиёр сўралган пулни унга қўш-қўллаб тутқазди. Бу аёлнинг режасидаги биринчи юриш эди.
Орадан ҳеч қанча ўтмай у заводга 4 та “Жентра” машинаси учун пул ўтказиб қўйганлиги ва уларни олиш учун устамага 800 АҚШ доллари зарур бўлаётгани ҳақидаги навбатдаги уйдирмани ўйлаб топди. “Ҳомий” бу маблағни беришда ҳам иккиланмади. Бироқ, қанча вақт ўтса-да, машинадан ҳам, пулдан ҳам дарак бўлмагач, Бахтиёр Хушнидани қистовга ола бошлади. Шунда аёл навбатдаги режага ўтди. Олган пулларини қайтариш учун Бахтиёр Неъматов номига банкда карта очирганлиги ва картани ўз қўлида сақлаётганини маълум қилди. Бир дугонасининг рақамидан Бахтиёрнинг телефонига банкдан унинг картасига 100 минг АҚШ доллари ўтказилганлиги ҳақида сохта смс жўнатди.
Афсуски, кўзига фақат катта пуллар кўринаётган Бахтиёр бу смсга ҳам ишонди. Кейин яна бир сохта марказий банк “ходима”си ўйлаб топилди. У аёл ҳам Бахтиёрга қўнғироқ қилиб, унинг картасидан банкка 4 та “Жентра” учун пул ўтганлиги, аммо бир киши номига 4 та машина берилмаслигини билдирди. У бу гапни Хушнидага айтганида, аёл унга ўша ходимага пора тариқасида қоғоз ичига бир неча дона “кўки”дан солиб берса, иши силлиқ кўчишини ўргатди. “Лақма ўлжа” аёлнинг бу кўрсатмасини ҳам бажариб, тўқима банк ходимасига совға тариқасида жами 4 минг 300 АҚШ доллари бериб юборди. Албатта, бу пулларни ўзим воситачилик қиламан, деган Хушниданинг қўлига тутқазди.
Орадан яна бир неча ой ўтди. На банкдаги доллардан, на машинадан, на унга очилган пластик картадан дарак бўлмагач, Бахтиёр Хушнидага босим қила бошлади. У иложсиз қолгач, 100 минг АҚШ доллари дея бир пачка пул кўрсатди.
— Аммо бир муаммо бор. Бу пулларни ишлатиш учун Давлат хавфсизлик хизматидан рухсатнома олиш керак, — деди.
Бахтиёр 100 минг АҚШ долларлик пачканинг фақат усти ва энг тагидагиси 100 долларлик, ичида эса 1 долларлик купюралар бўлганини билиб қолди. Ана шундан сўнг шира босган кўзлари ярқ этиб очилди ва ички ишлар органлари томон чопди.
Жиноят ишлари бўйича Хонобод шаҳар суди судланувчи Хушнида Олимовага етказилган зарарни жабрланувчига қоплаб бериш ҳақидаги қарор билан бирга тўрт йил муддатга озодликдан маҳрум қилиш жазосини тайинлади. Балки, бу фирибгарлик ортида Адҳам Олимовнинг ҳам қўли бордир. Ҳар ҳолда қайси эркак аёлининг шунча найрангидан бехабар қолади? Алданиб қолаётган шахсларни ҳам оқлай олмаймиз. Айнан уларнинг ишонувчанлиги товламачиларга қўл келади. Шундай экан, ҳамиша ҳушёр бўлайлик.
У. МИРЗААБДУЛЛАЕВ,
Жиноят ишлари бўйича Хонобод шаҳар суди раиси.
