“КIA” УЧУН ЭҲТИЁТ ҚИСМЛАР АСАКАДА ТАЙЁРЛАНМОҚДА

Атиги 2-3 йил аввал “UzAuto Motors” компанияси мамлакатимиз автомобилсозлик саноатида монопол корхона эди. “АDM JIZZAKH” заводининг ишга туширилиши монополиянинг таъсирини кескин камайтирди.

Натижада рақобат муҳити шаклланиб, бозорга янги русумдаги автомобиллар кириб келди, нархлар анча пасайди. Янги маҳсулотлар эса бошланғич тўловсиз, қулай шартларда харидорга етказиб берилмоқда.

Асакада фаолият юритаётган “ADM ELECTRICS” МЧЖ фаолиятига тамал тошининг  қўйилиши ҳам катта тантанага сабаб бўлган. Янги бинода  тўкин дастурхон ёзилиб, нуронийларнинг дуоси олинганди ўшанда. Бу воқеага кўп бўлгани йўқ. Икки йил ичида корхона кичик ва ўрта бизнес туркумидан йирик сигментга ўтиш арафасида турибди. Бу кичкина натижа эмас. Албатта, асакаликларда автомобилсозлик бўйича етарли тажриба тўпланган. Буни МЧЖ таъсисчилари яхши англаб  етгани учун уни айнан Асака шаҳрида ташкил этишга қарор қилган.

Корхона  ҳозирда “АDM JIZZAKH” МЧЖ томонидан ишлаб чиқарилаётган “KIA SONET”  ҳамда “KIA K3”  русумидаги автомобиллар учун электр қисмлари етказиб бериш билан шуғулланади. Кабель симлари, магнитофон, антенна, сигнал каби ускуналар ана шулар жумласидан.

Жиззахга бир ойда 25-35   миллиард сўмлик эҳтиёт қисмлар жўнатилади. Ишлаб чиқариш жараёнида 450 дан ортиқ ишчи иштирок этади. Уларнинг орасида аёллар ҳам кўпчиликни ташкил қилади. Ишчилар учун ҳар томонлама талабга жавоб берувчи қулай, замонавий меҳнат муҳити яратилган. 

Кўпчиликка маълум, юқорида тилга олинган автомобилларнинг нархи бугунги кун учун арзон эмас. Албатта, уни сотиб олган харидор ҳам анойи бўлмайди. Демак, ички қисмлар ҳам сифатга жавоб бериши,  ишлаб чиқарувчини уялтириб қўймаслиги керак.

— Сифат борасида муаммо  йўқ — дейди корхона бош ҳисобчиси Муслимбек Неъматуллаев. — Ҳар битта  бутловчи қисм ишлаб чиқаришдан сўнг махсус тест ускуналарида текширилиб, сифат назоратидан ўтказилади. Муаммо ва камчилик аниқланмасагина қадоқлаб, заводга юборамиз. Корхонамизда маҳсулотни ишлаб чиқариш бўйича  аниқ тизим бор. Ҳеч бир жараён  қўлбола  шаклда амалга оширилмайди.

Келинг, шу ерда бир ҳақиқатни  тан олайлик. Юртимизнинг қайси ҳудудида  бирон корхона ёки ташкилот ташкил этилса ёки муваффақиятли қадам ташлаётган бўлса, молиявий ҳамкор сифатида “Hamkorbank”ни танлайди. Бу танлов фақат унинг ўзига тегишли бўлади. Банк унга босим ўтказмайди ёки ваъдалар бермайди. Шунчаки стратегик, аниқ ишланган муваффақиятли шерикликни таклиф этади холос. Хулоса эса мижознинг ўзидан. “ADM ELECTRICS” билан ҳам ҳудди шундай мулоқот бўлиб ўтган. Ваҳолангки, корхонага ўша вақтнинг ўзида бошқа банклар ҳам ўз хизматларини таклиф этган. Бизнес эгалари имкониятларни таққослаб кўриб, якунда “Hamkorbank”ни маъқул деб топди. Ва Асака УБХО билан ўзаро бизнес ҳамкорлик шартномасига имзо чекди. Мана, икки йилдан буён  банк ва мижоз  муносабатлари  “аъло” кўринишда. Иккала томон ҳам бир-биридан мақсадли манфаат кўрмоқда. 

Хуллас, корхона ўз истиқболини  юқори баҳолайди. Бозордаги рақобат ёки нархларнинг тушиши унинг келажакдаги фаолиятига салбий таъсир ўтказмайди. Ишонамизки, Жиззахда бутланаётган “КIA SONET” ёки “KIA K3” туркумидаги автомобиллардан сотиб олсангиз, унинг электр билан боғлиқ эҳтиёт қисмлари сизга асло панд  бермайди.

Н.ТЎХТАМАТОВА