БИЛАГИДА КУЧИ БОР
Армрестлинг билагида кучи, юрагида шижоати борларнинг танлови. Ақлий меҳнат билан шуғулланувчи инсонларнинг бу каби спорт турларига қизиқмаслик эҳтимоли катта. Аммо Нурафшон УБХО универсал кассири Гулнора Жўраева ўзини айнан билаги бақувватлар ўйинида синайди. Ҳа, худди шундай. Унинг бахтига армрестлинг “Нamkorbank”да ўтказиладиган спорт мусобақалари таркибига киритилган.
— Ёшлигимдан спортга қизиқишим бўлган, стол теннисига қатнашиб юрганман. Уч йил аввал Нурафшон УБХОнинг касса хизматида иш бошладим. “Нamkorbank”да ҳар хил турнирлар ўтказилишини эшитиб, очиғи, қувонгандим. Менга ўхшаган спортсеварлар учун яхши имкониятда бу. 2023 йил Марказий банк томонидан Тошкент вилоятида ўтказилган спорт беллашувларида шашка бўйича иштирок этиб, иккинчи ўринни олдим. “Нamkorbank” ташкил этган ўйинларда ҳам шашкада шу натижани қўлга киритдим.
2024 йилда ўзимни армрестлинг бўйича синаб кўришга қарор қилдим. Банкимиз томонидан ўтказилган турнирда биринчиликни олдим. Албатта, финал босқичига шунчаки чиқиб қолганим йўқ. Унгача 3 та саралашдан ўтганман. Финалда эса 4 нафар рақибни енгиб, ғолиб бўлдим. 2025 йилда худди шу йўналишда 2-ўринни эгалладим. Нукус МБХО вакили Мийрасхан Аббиниязовага имкониятни бой бериб қўйдим ўшанда, — дейди Гулнорахон.
Куч синашиш учун танада куч бўлиши керак. Кассир қизимиз табиатан бақувват. Вазни 90 кило, бўйи 170 см. Спорт билан ҳам шуғулланиб туради. У финалга турмуш ўртоғи билан тайёргарлик кўрган. Турмуш ўртоғи ички ишлар соҳасида ишлагани учун спортда яхшигина тажрибага эга.
Инсондаги истак-хоҳиш уни турли мақсадлар сари ундаб туради. Истак кучли бўлса, ҳар қандай тўсиқларни енгиб, кўзлаган чўққисини забт эта олади.
Гулнора яна армрестлингда ўзини синаб кўрмоқчи. Энди фақат ғалаба учун майдонга тушади, биринчиликни бошқаларга бериб қўймоқчи эмас.
Н. ТЎХТАМАТОВА
