БУХОРОДАГИ БАНКНИНГ БОШ ОШПАЗИ
тайёрлаган таомлар машҳур ресторанлардагидан қолишмайди
… Тушликни тамомлаб, ўрнидан қўзғалган банк ходимлари елиб-югуриб хизмат қилаётган, ғайрат-шижоати хатти-ҳаракатидан сезилиб турган ошпаз аёлга одатдагидай миннатдорлик билдиришди:
— Дилноза опа, мазали тушлик учун сизга катта раҳмат! Бугунги тайёрлаган овқатларингиз ҳар кунгидек зўр!
— Сизнинг таомларингиз кишига ёқимли қувват, ҳузур бахш этади. Қўлингиз дард кўрмасин.
— Пиширган овқатларингиз Европадаги машҳур ресторанларникидан асло қолишмайди. Яхшиям, сиз бор экансиз, йўқса, ширин таом қанақалигини билолмай юраверардик.
Бундай эътирофларга нисбатан Дилноза Умурова қўлини кўксига қўйиб, “Еганинглар ош бўлсин, хуш кўрдик”, деганча жилмайиб қўяди. Бироқ кўнглининг туб-тубида ажиб бир шукуҳ, сурур, шу билан бирга шукроналик ҳислари зуҳурланади. Яқин вақтларгача у “Шу касбни танлаб тўғри қилдимми, турган-битгани машаққат-ку?! Кўпчиликнинг кўнглини олиш осонмас, ахир!” дея иккиланиб қоларди. Тиришқоқлиги, меҳнатсеварлиги, хушмуомалалиги, касбига бўлган меҳру муҳаббати барчасидан устун келди.
“Hamkorbank” АТБ Бухоро филиали хўжалик бўлимида ошпаз (ҳозирда шу мақомдаги катта ишчи) сифатида иш бошлаганига ҳали кўп вақт ўтмаган бўлсада, тездаёқ каттаю кичикнинг эътиборига тушди. Доим ошхонада яратувчилик меҳнати билан машғул пазанда шериги ҳамкорлигида таомларнинг ранг-баранг, мижозлари талаб-истагига мос бўлишига интилишади.
Нафақат миллий, балки, машҳур хориж таомларини ҳам пиширишни ҳадисини олган Д. Умурова аслида юридик коллежни тамомлаган. Аммо…
— Турмушга чиққач, касбимни ўзгартиришга тўғри келди, — дейди у. — Буни ҳаёт дейдилар. Хуллас, дипломни бир четга қўйиб, банкнинг ишчи-ходимларидан бирига айландим-қолдим. Танловимдан асло хафа эмасман. Ишим ўзимга ёқади. Айниқса, қилган меҳнатларинг учун миннатдор бўлишса, қувониб кетасан киши. Филиалимиз жамоасининг ишончи менга туганмас куч-қувват беради.
Унинг самимият уфуриб турган сўзларини эшитарканман, каттаю кичикнинг дилини яйратган “Ошпаз қўшиғи”нинг шўх оҳанглари борлиқни қучгандай бўлди гўё:
Ошпазлик касби корим,
Меҳнатим ифтихорим.
Куймасин деб тагини, тагини,
Пасайтирдим оловни.
Тезроқ пишиб чиқсин деб,
чиқсин деб,
Дамлаб қўйдим паловни…
Бухорои шарифга йўлингиз тушгудай бўлса, албатта “Hamkorbank”нинг Бухоро филиалига, аниқроғи, унинг ошхонасига бир зумга бўлсада кириб ўтинг. Дилнозахоннинг тайёрлаётган таомларидан истаганингизни тотиб кўринг. Кетган вақтингизга асло ачинмайсиз.
Ҳалимжон ТОҲИРОВ.
