ЎЗБЕКИСТОН МАҒЛУБИЯТГА УЧРАМАЙДИ

18 июнь куни Тошкент вақти билан соат 07:00 да Мехико шаҳрида 2026 йилги жаҳон чемпионати гуруҳ босқичи биринчи тури доирасида Ўзбекистон терма жамоаси Колумбия миллий жамоасига қарши майдонга тушади. Мундиалдаги илк ўйин – ўзбекистонликлар учун тарихий дебют қандай кечади?

Россиянинг машҳур манбаларидан ҳисобланган football.kulichki.net сайти экспертлари бўлажак учрашувга қуйидагича прогноз берди.
Ўзбекистон терма жамоаси АҚШда унчалик илиқ кутиб олинмади, аммо бу ҳолат Фабио Каннаваро бошчилигидаги жамоани руҳан синдиргани йўқ. Италиялик мутахассиси қўл остида миллий жамоа ҳали расмий учрашув ўтказмаган, жаҳон чемпионати йўлланмаси эса Тимур Кападзе бошчилигида қўлга киритилган эди.

Июнь ойидаги назорат учрашувларида Каннаваро шогирдлари кетма-кет икки бор мағлуб бўлди, аммо Нидерландияга қарши ўйиндаги (1:2) ўйин сифати Каннаваронинг ўзига маъқул келди. Жаҳон чемпионати олдидан энг катта муаммо – Одил Ҳамробеков, Хожиакбар Алижонов, Жалолиддин Машарипов ва Азиз Ғаниевнинг терма жамоага ёрдам бера олмаслигидир. Колумбия терма жамоасининг тажрибаси, албатта, ўзбекистонликларникидан анча юқори. Ўзбекистон энди ўз тарихини ёзаётган бир пайтда, колумбияликлар мундиалларга чиқиш ва катта турнирларда иштирок этишни яхши ўзлаштирган.
Жаҳон чемпионати саралаш босқичида Колумбия фақат Аргентина ва Эквадорга йўл берди, мусобақа олдидан ўтказилган назорат учрашувларида эса саккизта ўйиндан фақат Хорватия ва Францияга ютқазди.
Қизиқишни янада ошираётган яна бир омил – жамоа етакчиларидан бири Жон Кордобанинг аҳволи билан боғлиқ. Эамоа етакчиси ҳозирча идеал спорт формасида эмас.
Статистик маълумотлар
– жамоалар илгари бирор марта ўзаро тўқнаш келмаган;
– ўзбекистонликлар кетма-кет икки ўйинда мағлуб бўлиб, умумий ҳисоб 1:4 ни ташкил этган;
– сўнгги саккизта ўйинда Ўзбекистон терма жамоаси фақат икки бор мағлубиятга учраган;
– Колумбия терма жамоаси сўнгги 13 учрашувда фақат икки марта мағлуб бўлган;
– Колумбия 2026 йилда ўтказган тўрт ўйиннинг учтасида гол ўтказиб юборган;
– ФИФА рейтингида Ўзбекистон (50-ўрин) Колумбиядан (13-ўрин) анча пастда жойлашган.
Экспертлар тахмини
Таҳлилчилар Ўзбекистон терма жамоасининг салоҳиятини етарлича баҳоламаётгандек кўринмоқда. Бу жамоа энг кучли рақибнинг ҳам ўйинини бузишга қодир экани кўп марта исботланган. Албатта, Жанубий Америка вакили таркиб жиҳатидан кучлироқ, аммо меҳнатсеварлик, интизом ва жамоавий ўйин кўп ҳолларда индивидуал маҳоратни ҳам енгиши мумкин.
Тахмин:
Ўзбекистон терма жамоаси мағлубиятга учрамайди