ТАНЛОВДА АДАШМАДИК

Бу йигитларни яхши танийман. Қачон “Бизнес марказ” БХОга биронта банк хизматидан фойдаланиш учун кирсам, улар ўз иш столида мижозлар билан банд бўлади. Шоҳруҳ Абдуллаев юридик мижозларга микрокредит ажратиш менежери, Раҳматилло Иброҳимов эса универсал менежер. Ушбу икки ходим амалиётларни бир-бирига боғлиқ ҳолда бажаришади. Шоҳруҳ ҳамкорликка таклиф қилган юридик мижозларга Раҳматилло ҳисоб-рақам очади.

Шоҳруҳ киришимли, очиқ йигит, Раҳматилло эса оғир-босиқ, камгап. Лекин бу характери унинг мижозлар билан муносабатига салбий таъсир кўрсатмайди. Аксинча, кўп ҳолатларда мурожаатчилар билан вазминликда ижобий мулоқотни йўлга қўяди. Энг қизиғи, бу икки жамоадош “Hamkorbank”ка бирин-кетин келган. Иккаласи ҳам аввал Нодирабегим УБХОда иш бошлаб, бугунги кунда “Бизнес марказ” БХОда фаолият юритишмоқда.
— Бу соҳага кирмай аввал банк ишини осон деб ўйлагандим, кейин билдимки, ўзига яраша қийинчиликлари бор экан. “Hamkorbank”ка келиб, мижозлар билан ишлашни, сабрли бўлишни ўргандим. Айни пайтда экзел дастурини батафсил ўзлаштиряпман, қўшимча равишда молиявий таҳлилга чуқур киришдим, — дейди Ш.Абдуллаев.
Унинг айтишича, февраль ойидан буён юридик мижозларга 6 миллиард сўмдан ортиқ кредит ажратган. БХО жойлашган ҳудуд юридик шахслар учун у қадар қулай эмас. Шу боис Шоҳруҳ кўпроқ ҳамкорларни маркетингга чиқиш орқали жалб қилади.
Раҳматилло ҳозирча кредит йўналишига ўтмади. Касса хизматида иш бошлаб, чакана бўлимда пул ўтказмалари ва пластик карта билан ишлашни ўрганди. Ёш ходим келгусида кредит хизматларини ҳам ўзлаштирмоқчи. Унинг айтишича, бу тизимга келиб қолишига талабалик давридаги танлов ва таклифлар сабаб бўлган. Турли ташкилотлар томонидан ўтказил­ган танловда “Hamkorbank”нинг репутацияси устунлик қилган.
— Биринчи ўринда маошга, ундан кейин ходимларга яратилган шароитларга эътибор қаратганман. Устозларимиздан ҳам сўраб-суриштириб, уларнинг маслаҳат ва тавсиялари асосида шу банкни танлаганман, — дейди Раҳматилло.
Ҳа, бугун иккала ходим ҳам “Hamkorbank”даги фаолиятидан мамнун. Бу банкни танлаб хато қилмаганини тушуниб етмоқдалар. Ахир маълум бир соҳага қадам қўйиб, шу касбнинг орқасидан жамиятга хизмат қилмоқчи бўлган мутахассиснинг вақт ўтган сари тўғри йўлда эканлигини англаши катта ютуқ. Чунки бу тизимда қадр-қиммат ҳам, даромад ҳам, келажак ҳам бор. Бу эса бугунги кун ёшларининг орзуси.

Н. ТЎХТАМАТОВА